Berisha në Këshillin e Europës: Shqipëria përballë një kërcënimi ekzistencial, qëndrim për të shpëtuar kombin
Kreu i Partisë Demokratike, Sali Berisha, ka ngritur shqetësimin për përmasat e emigracionit dhe shpopullimit të Shqipërisë, duke e cilësuar situatën si një kërcënim real ekzistencial për vendin. Në fjalën e tij para Asamblesë Parlamentare të Këshillit të Europës, Berisha kërkoi një qëndrim më të fortë ndërkombëtar ndaj zhvillimeve në Shqipëri. Ai iu referua të dhënave të Eurostat-it, sipas të cilave një pjesë e konsiderueshme e shqiptarëve jetojnë në vendet e Bashkimit Europian.
“Shqipëria ndodhet përballë një kërcënimi ekzistencial, atë të shpopullimit”, deklaroi Berisha, duke theksuar se emigracioni masiv po sjell pasoja të rëndësishme demografike dhe sociale. Sipas tij, nga çdo 1 mijë shqiptarë, 466 jetojnë në vendet e BE-së, shifër të cilën kreu demokrat e përdori për të nënvizuar përmasat e largimit të popullsisë nga vendi.
Berisha u ndal te roli historik i diasporës shqiptare, duke e cilësuar atë si një faktor të rëndësishëm për mbijetesën dhe zhvillimin e kombit. “Asnjë komb nuk mund dhe nuk duhet të jetë më krenar për diasporën e tij sesa kombi shqiptar. Diasporës i detyrohemi pothuajse mbijetesën tonë, liritë tona, si dhe një kontribut të jashtëzakonshëm në kulturën tonë”, tha ai.
Duke iu referuar një studimi të Justin Gast, Berisha tha se emigracioni mund të shkaktojë atë që ai e përshkroi si “rrjedhje demografike”, me pasoja afatgjata për vendet e origjinës. Sipas kreut të PD-së, situata në Shqipëri nuk mund të shkëputet nga problematikat që ai ia atribuon qeverisjes së vendit. “Kjo është tërësisht pasojë e narkoshtetit shqiptar”, deklaroi Berisha, duke bërë gjithashtu akuza të forta lidhur me trafikun e drogës dhe aktivitetin e grupeve kriminale shqiptare në Europë. Në përfundim të fjalës së tij, kreu demokrat kërkoi angazhim ndërkombëtar, duke e cilësuar atë si të nevojshëm “për të shpëtuar kombin”.
360grade.al
